Harpe, n'autre menestrausie,
ne oysel que chaunt u boys,
Ne sount si noble melodie,

come de femme oyr la vois.
Mout purrad mener sure vie,

que de femme puet aver choys; Quar à tous biens femme plye,

come fet la coudre que porte noys
e foyl;

Qui bealté plaunta en femme,
molt chosy noble soyl.

Il n'y out unqe honme née

pus le temps Adam e Eve, Qe sout de femmes la bounté

où comence ne où acheve;

A demostrer tiel segrée,

moy serreit donqe chose greve;

Mès pus qe je l'ay comencée,

avant dirroi ou parole sweve

e fyne,

Femmes dussoms tous honorer,

pur l'amour d'une meschyne.

Korteysie en femme git,

en lu où ad bel desport;

E cely en fenme char prist,

qe d'enfern nus dona resort;

E de femme cil nasquist,

qe pur nus pus suffry la mort. Qui à femme fet despit,

il me semble que il ad tort,
En taunt;

Quar en femme descendist,
Jhesu le tot pussaunt.

L'amour du mound en femme habite,
en un lu molt aimable;

Yl n'ad pas choysy lu petite,
mès large, grant, e delitable.
Yl ne trovera que ly desheryte,
là puet il meyndre tot dis estable;
Son ostel est de tous maus quite,

pur veyr le dy, sauntz mot de fable,
dedenz,

Que mavesté quert en femme,

certes il pert son tenz.

Marie, que portastes le salveour,

vostre grace vus requer,

Me seiez ayde e socour,

pur l'onour de femme sauver, Qe portent fruyt de bel colour,

noble, douce, ne mie amer; Gentz que sount de grant valour, qe le mound governent enter, par sen,

Bené soit tiel arbre

que tiel fruit porte! Amen.

Rote de la russinole

je tienk pur nient en temps de May,

E de chescun oysel que vole,

encountre une que nomé ay. Quar ele chaunte de bone escole,

e tient le cuer de honme en gay, Il porte le bek douce et mole

;

si mestier soit, nomer le say

par noun;

Quant diensist femme compaigne à honme,

molt lur dona bel doun.

Ou femmes est honour enjoynt, de bountés sunt racyne;

Pur chescun mal qu'en honme poynt,

femme porte medicine.

Quant eles ount le mal enoynt,

languisse va e tost fyne;

L'amour de cele Dieu nous doint,

à cui le mound enclyne!

e prie,

Al jour de le graunt jugement,

que ele nous seit aye!

Parvenke de pris e sauntz pier,

sount femmes sur tote autre rien;

Quar nul ne savera devyser

la bounté de femmes, ce savoms bien.

Femmes portent le vis cler,

Unque ne trovay en ly

fors bounté e cuer certeygne.

Quoyntement s'en vont armée

de grant bealté, que pert dehors, E dedenz de tot bounté

en ount repleny tot le cors; Mout serroit donque grant pieté, si tous tieles fuissent mors,

Que pur nus ount grevement plorée,

e ce à molt grauntz tortz,

sovent;

Nul ne savera devyser

la joye que de eux descent.

Rose, qu'est de bel colour,

e d'esté porte l'enseygne,

Ne gitte poynt si fyn odour

come est de femme la douce aleyne.

Qui porreit donque nuit e jour

aver une en son demeyne,

Mout purreit vivre à grant honour,

e en joie sauntz nulle peyne

u mounde;

Nul ne savera deviser

la joie que de femme habounde.

Si tous l'espieces en tenz de pees,

qe de tous terres venent par mer, Fuissent lyés en un fees,

e um les devereit bien juger,

Il n'y a nul de tel relees,

come de femme un douz bayser, Ce su je prest prover adès,

qui me vodra countrepleyder

en dyt ;

Car femme est la plus graciouse chose que unqe Dieu fyt.

Tryacle, tresbien tryée,

n'est poynt si fyn en sa termyne, Come est le lycour alosée

quy femme porte en sa peytrine. Bien doit tiele chose estre amée,

que porte si noble medicine! Meint foyz est anguissée

par nous fenme en gysyne,

sanz bobance;

Nul ne savera deviser

come sunt pur nus en grevaunce.

Volables ne sunt point de corage,

quar eles se tienent en une assise;

A eux ne serra dit hountage,

quar il sount de bone aprise;

Come plus est venu de haut parage, meinz s'en orguile en tote guyse.

Chescun qu'est de bon estage femmes honourt par soun devyse tot dis;

Honour en bone femme

ne puet estre mesassis.