Dars ne heez je mie

fenduz de quonie ;

anguille de gors de sa pieu vendie,

conger, estorgoun,

luz, salmoun,

vendoise, breme, ne gerdon,

ne morue ou l'aille, ne creinte pellé,

ne roches, ne lampré,

ne raye refreidé,

ly makerel freshe e novel, e tot cist autre bon morsel mout la bourse veydée.

Quant la pasche repeire,

je m'y last tayre,

tart e flaon faz fere,

pur la sesoun retrere;

molt aym motoun à gras reynoun,

e l'aignel faz fors trere,

de pelicoun,

m'entencioun

met au poyvre

defere.

Droyz est qe l'en eyt motoun

en porrée pucynz,

en verynz,

oue en franke garde,

atant novel

jus de tuel,

la teste en rost après lowel,

e gras cheveryl larde,

C

Si toun ami as esprové,

ne ly devés pas offendre; Mez seiez de une volenté,

grant bien en purrez prendre; Ne seiez pas de ly grevé

quei qe um vus face entendre; Quar meint um quide aver trové, qe puis ly estuit rendre.

Si te avient qe eiez mester de counsail ou de aye, Ne le devez pas à tous mostrer, tant ad le siecle envie. A toun ami n'estuit celer ton consail ne ta vie ; Quar si il te puet de ren valer, il ne vus faudra mie.

E vostre bon ami tenez, ne devez pas retrere,

E lealment li consilez ;

com leals amis doit fere. Vostre counsail à ly mostrez, à ly ne devez tere,

Si lealment vus entreamez, le un puet l'autre crere.

Si vostre ami velt mesaler,

la main le devez tendre;

Ne ly soffrez pas soun voler, si vus le poez defendre. Mès bel ly devez chastier,

e entre vus reprendre ;

E come vus meismes en le ester, sauntz nulle rien offendre.

Si vus oiez de vostre ami
parler par aventure,
Ne devez mettre en obly

de preisir sa porture. Les bienz diez derere ly, devant ly à mesure; Quar losenger e leal ami

diversent par nature.

Entre amis seit oweleté,

senz, e corteysie, Amour e debonereté,

e tele compagnie,

Qe tant me volez de bounté,
de solas, e de aye,
Come vodrez qe feisse-je,
si je usse grant mestrie.

Uncore y a en fyn amour chose qe molt me agrée, Parount si pasent ly plusour,

dount jà n'est regardée ;

Si vostre ami est en dolour,
en play, ou en mellée,
Ne le guerpez à deshonour,
pur coup ne pur colée.

Vostre ami cherissez,

si me volez crere;

De nulle rien ly priez,

si il ne le pust bien fere. Quar si il ne le fet, vus ly grevez, quant il ne le peut parfere;

E si il mesfet, vus meserrez, car ce fet pur vus plere.

Uncore y a en la lessoun
un petit plus à fere,
La privité ton compaignoun
ne devez pas retrere;
Soun consail te est confessioun,
assez en devez tere;

Si en tant ly feissez tresoun,
à envis vus dust um crere.

Si vostre ami est en pecchié, qei qe nul autre en die, Tot sachez vus la verité,

ne le descoverez mie.

Car meint um fust plus avilée,

si l'em sust sa folie,

E meint um pecche en privitée, e pus prent bone vie.