Visam Britannos hospitibus feros, Et laetum equino sanguine Concanum ; Visam pharetratos Gelonos,
Et Scythicum inviolatus amnem.
Vos Caesarem altum, militiâ simul Fessas cohortes abdidit oppidis, Finire quaerentem labores
Pierio recreatis antro.
Vos lene consilium et datis, et dato Gaudetis, almae. Scimus ut impios Titanas immanemque turmam Fulmine sustulerit caduco,
Qui terram inertem, qui mare temperat Ventosum, et urbes, regnaque tristia, Divosque, mortalesque turbas, Imperio regit unus aequo.
Magnum illa terrorem intulerat Jovi Fidens juventus horrida brachiis, Fratresque tendentes opaco
Pelion imposuisse Olympo.
Sed quid Typhoeus, et validus Mimas, Aut quid minaci Porphyrion statu, Quid Rhoetus, evulsisque truncis Enceladus jaculator audax,
Contra sonantem Palladis aegida Possent ruentes? Hinc avidus stetit
Vulcanus; hinc matrona Juno, et Numquam humeris positurus arcum,
Qui rore puro Castaliae lavit Crines solutos, qui Lyciae tenet Dumeta natalemque silvam, Delius et Patareus Apollo.
Vis consili expers mole ruit suà: Vim temperatam dî quoque provehunt In majus: îdem odere vires
Omne nefas animo moventes.
Testis mearum centimanus Gyges Sententiarum; notus et integrae Tentator Orion Dianae, Virgineâ domitus sagittâ.
Injecta monstris terra dolet suis, Moeretque partus fulmine luridum Missos ad Orcum: nec peredit Impositam celer ignis Aetnen:
Incontinentis nec Tityi jecur Relinquit ales, nequitiae additus Custos: amatorem trecentae
Pirithoum cohibent catenae.
Coelo tonantem credidimus Jovem Regnare praesens divus habebitur Augustus, adjectis Britannis Imperio, gravibusque Persis.
Milesne Crassi conjuge barbarâ Turpis maritus vixit! et hostium (Proh curia, inversique mores!) Consenuit socerorum in arvis,
Sub rege Medo, Marsus et Appulus, Anciliorum et nominis et togae Oblitus, aeternaeque Vestae, Incolumi Jove et urbe Româ!
Hoc caverat mens provida Reguli, Dissentientis conditionibus Foedis, et exemplo trahenti Perniciem veniens in aevum,
Si non periret immiserabilis Captiva pubes. Signa ego Punicis Affixa delubris, et arma
Militibus sine caede, dixit,
Direpta vidi: vidi ego civium Retorta tergo brachia libero,
Portasque non clausas, et arva Marte coli populata nostro.
Miles redibit? Flagitio additis Damnum. Neque amissos colores Lana refert medicata fuco;
Nec vera virtus, quum semel excidit, Curat reponi deterioribus.
Si pugnat extricata densis Cerva plagis; erit ille fortis,
Qui perfidis se credidit hostibus, Et Marte Poenos proteret altero, Qui lora restrictis lacertis
Sensit iners, timuitque mortem.
Hic, unde vitam sumeret inscius, Pacem duello miscuit. O pudor! O magna Carthago, probrosis Altior Italiae ruinis!
Fertur pudicae conjugis osculum, Parvosque natos, ut capitis minor, Ab se removisse, et virilem Torvus humi posuisse vultum:
Donec labantes consilio patres Firmaret auctor numquam aliàs dato, Interque moerentes amicos
Egregius properaret exul.
Atqui sciebat quae sibi barbarus Tortor pararet: non aliter tamen Dimovit obstantes propinquos,
Et populum reditus morantem,
Quàm si clientum longa negotia Dijudicatâ lite relinqueret, Tendens Venafranos in agros, Aut Lacedaemonium Tarentum.
Delicta majorum immeritus lues, Romane, donec templa refeceris, Aedesque labentes deorum, et Foeda nigro simulacra fumo.
Dîs te minorem quòd geris, imperas : Hinc omne principium, huc refer exitum. Dî multa neglecti dederunt Hesperiae mala luctuosae.
Jam bis Monaeses et Pacori manus Non auspicatos contudit impetus Nostros, et adjecisse praedam Torquibus exiguis renidet.
Penè occupatam seditionibus Delevit urbem Dacus et Aethiops;
« AnteriorContinuar » |